لو شفتوهم فى الشارع امشوا على طول ، الناس دى بتبقى حرامية وممكن يسرقوكم أو يخطفوكم .........
هى دى التعليمات الخاصة بالتعامل مع مجموعات الحواة اللى الأهالى بتلقنها لأطفالها الصغيرين. شخصيا الكلمات دى إنطبعت فى عقلي وبمساعدة الهيئة الخارجية للأشخاص دى - الحواة - إتكونت صورة ذهنية عن وحوش حرامية و يمكن قتلة . النهاردة وفى برنامج تليفزيوني إسمه حلاوة روح على قناة أو تى فى الصورة دى تحولت لشعور غامر بالشفقة و الحزن و العطف !! كان الشعور غامر لدرجة الرغبة العارمة فى البكاء !!! . 3 شباب سنهم بين 20 - 25 سنة ملامحهم مصرية أصيلة غالبا من أصول صعيدية... بيأكلوا النار و بينطوا من الحلقات المشتعلة نار أو اللى مثبت عليها سكاكين حادة ... بيناموا على سجادة من المسامير الحادة و بيقف على صدرهم واحد من زملائهم . وجوههم فيها علامات جروح أدوات حادة . للوهلة الأولى ممكن تتصور إنها نتيجة معارك أشقياء ومسجلين خطرين وتترسخ الصورة فى ذهنك أكثر .... لكن لو دققت فى عيونهم تلاقى حزن وإنكسار هااااااااااااائل - بالبلدي "غُـلـب"- ولما سمعت بيقولوا إيه إتأكد الشعور ده . أول واحد و الكبير بتاعهم قال .. أنا كنت شاطر فى الدراسة لكن إتصاحبت على ناس مش كويسة و هربت من أهلى وواحد منهم كان بيشتغل الشغلانة دى إتعلمتها منه .... الثانى قال إن الجروح اللى فى ووجوهنا و جسمنا دى من إصابات السكاكين و المسامير لما كنا صغار و بنتعلم و الثالث إتكلم عن مشاكلهم مع الناس و البوليس اللى كل شوية يقبض عليهم .... والثلاثة إتفقوا إنهم نفسهم ما يشتغلوش
الشغلانة دى و يلاقوا بديل و حذروا أى حد إنه يفكر يحترفها !! .
يمكن ما يكونوش ملائكة وضحايا اكثر من ناس كثيرة بنشوفهم كل يوم و أكيد الصورة الذهنية المقولبة المتكونة عند كل الناس عنهم لها أساس لكن ...صعبوا على
No comments:
Post a Comment