<h3> سعاد أخت القمر</h3>

أنا سعاد أخت القمر
بين العباد حسنى انتشر
...
طولي شبر ووجهي بدر
صوتي سحر كلي بشر

دى كانت أغنية إتكتبت مخصوص للمرحومة سعاد حسنى وهى طفلة بس أنا قررت أسبغها كمان على سعاد ماسى بعد حفلتها هنا فى إسكندرية يوم 19 اللى فات .الفرق الوحيد بين سعاد اللى فى الأغنية و سعاد اللى شفتها إن سعاد ماسى أطول من الشبر ده شويتين .البوست اللى فات كان أول رد فعل للحفلة لأن دى أغنيتى المفضلة لسعاد حتى لو مش هى أحسن أغانيها لكن هي فرحتنى جدا إنها غنتها تانى أغنية فى الحفل وعادت و زادت فيها وأنا طايرة من البهجة والفرح . سعاد كانت منورة الشاطبى بحالها بصوتها اللى فيه كل حاجة بمعنى كل حاجة. و طاقتها اللى ما نضبتش طول ساعتين الحفلة و بسمتها الرائعة من غير أى مكياج و البنطلون و البلوزة الكتان الأبيض اللى نوروا الحفلة زيادة . ده غير أخوها القمر كان طالع هلال رائع فى سماء صافية و متمركز بالضبط فوق المسرح المكشوف فى المكتبة . وريحة البحر من الميناء الشرقى نقلها لنا نسيم خفيف لطيف من غير رطوبة ساعد إن الجو العام للحفلة يبقى أكثر من خيالي. الناس كانت أكتر من الكراسى المرصوصة وأنا شخصيا كنت محظوظة إنى فى الصف الرابع أو الخامس قدامها تماما . الأعمار و الخلفيات واضح إنها متباينة جدا مابين هواة موسيقى على قد حالهم زى حالتى و هواة فاهمة موسيقى بجد و فرانكوفونيين مصريين وأجانب متحدثين بالإنجليزية واضح انهم مقيمين فى إسكندرية حاليا و عيال فرافير جايين تحضر حفلة روك و رجال و سيدات فى اعمار الخمسينات و ما فوق و حتى شباب-دول بقى كانوا فى الصف اللى قدامى على طول- واضح من رد فعلهم طول الحفلة إنهم لا سمعوا عنها ولا بيحبوا نوعية موسيقاتها ولا حاجة خالص .بس أعتقد إن الأغلبية إعجابهم الشديد بسعاد كان السبب الأساسى إنهم حضروا الحفلة . المهم إنها حركت حتى الحجارة اللى كانت قاعدة قدامى و فى اخر الحفلة حتى دول انفعلوا مع الأداء و الموسيقى و الجو العام. وكان عندى إستعداد الحفلة تمتد 7 ساعات مش 2 بس ومش مهم الشغل تانى يوم .كانت ليلة رائعة بجد نفسى تتكرر تانى وتالت و عاشر و تيجى عشان نسمع ونشوف نموذج غير منتجات أخصائيين التجميل اللى منتشرة اليومين دول وبيقولوا عليهم فنانات . دا الواحد كان نسى يعنى إيه فنان. ربنا يحمى سعاد ماسى ّ

مشمشة : فاتك كتييييييير