Triple

1/3 أحلام
مشمشة - دى ليكى . قررت أكتبها هنا بدل الميل . عشان بعد 5 سنين كمان نرجعلها و نشوف الأيام وصلتنا فين .

المناسبة : الكارت اللي بعتيه و إنه فكرك بالحلم القديم . أنا كمان إفتكرت الحلم و عندى قناعة - أو يمكن أمل - إنه لسه ما وصلش لنهايته . طبعا دة نتيجة إيماني إنك فيكي نوع من "الشفافية " . طبعا عارفة قصة سيدنا يوسف عليه السلام ، الأحلام اللي فيها إتحققت علي مدى سنين - مع الفارق طبعا . فى نفس يوم ما شوفت الكارت كان فيه حلم تانى بتاعى - أو حديث نفس - مش عارفة ، و قبلها بأسبوع حلم تالت من أختى - هي زيك كدة فيها شفافية ، غريب هو كمان ....... مش عارفة بس حسيت انى لازم اكتب الكلام ده هنا عشان يفضل موجود فترة قدامنا .أما نشوف .

2/3 سجن العمر
توفيق الحكيم فى كتابه سجن العمر قال إن عاداتنا و أفكارنا هى اللى بتسجننا طول عمرنا.

3/3 الكاف
قصة قصيرة قرأتها من حوالي 15-20 سنة . قصة من أمريكا اللاتينية و غالبا من البرازيل.

ملخصها - الركيك - إن ولد صغير كان أبوه عنده مراكب صيد كتير طلب من والده إنه يطلع رحلة صيد مع الصيادين . وهو فى البحر قال لرئيس الصيادين إنه شايف خيال أسود ماشي وراء القارب . مفيش حد غيره كان شايف الخيال ده . رئيس الصيادين أخذه و حذره إنه يطلع تانى على سطح المركب ، قال له: ده الكاف .لو ظهر لصياد ، الصياد بيموت . الولد إرتعب و الأب الغني منعه تماما يطلع البحر و لما كبر بعته يدرس فى مدينة بعيدة عن البحر تماما . لكن الإبن كان دايما مرعوب و حاسس إن فيه دايما حاجة قوية بتناديه للبحر . كان خايف يرضخ لها . الخوف ده نغص عليه حياته و ما قدرش يستمتع بأى حاجة فيها . كبر الولد و أصبح رجل عجوز ولا زال خايف ، مرعوب . الرعب و القلق و صله لقرار . رجع مدينته و ركب قارب ودخل لوسط البحر و صرخ فى الكاف أنه يطلع له ، كان عاوز يموت عشان يرتاح من الرعب اللى لازمه عمره كله. طلع الكاف ومعاه لؤلؤة كبيرة كبيرة . قال له: أنت تعبتنى ورأك طول عمرك أنا مطلوب منى أوصل لك اللؤلؤة دى هدية من ملك البحار و لازم تأخدها

!!!بعد أيام طويلة البحر رجع للشط قارب فيه هيكل عظمي وكرة حجر كبيرة