يعنى هو النكد له ناسه تقريبا ... ساعة المفترض انه فرح مش بأعرف أفرح كويس .. ليه ؟ رفض ؟ تحسب ؟ ترقب ؟....ما أعتقدش بصراحة أنها حاسة سادسة ولا سابعة ولا إستشراف لحدث قريب .. لأ .. هو يا تحسب .. يا ترقب ... نكد نكد يعنى .. طيب ماتعيشى اللحظة و السلام .. ليه دايما بتحسبي التبعات ؟ أنا بصراحة مقتنعة أن التبعات لازم تتحسب ... بس مش كده يعنى .. ده كان كأنه إجتماع لمجلس الأمن ! طيب مش كده أحسن .. ماهو لو كان إجتماع مجلس أنس و أنتهى لنفس النتيجة ما كانتيش هاتسامحى نفسك ! ! ماهو أصلا ماكانش هايوصل لمرحلة أنس دى أبدا .. أحنا هانضحك على بعض ؟ ماحنا عارفين اللى فيها ! المقصود شوية لين ... بس ماكانش ينفع برضه . بكل المقاييس اللى أنا أفهمها ماكانش ينفع ! هى كده .. إستيعابى مختلف للمواقف دى ... ده لو فيه أى نوع من أنواع الأستيعاب ؟! بصراحة أنا حاسة أن الإستيعاب فى المنطقة دى زيرو !!؟طيب و بعدين ؟ إرتاحتى كده ؟؟ لأ.. مع هلوسة وتخريف السخونة لقيتني مش مرتاحة ..وعاوزة اعرف ليه و علشان إيه ؟ و التفسير "المنطقي " إيه ... الله يخرب بيت المنطق اللى جابنا ورا .. ماهو ده أصل البلوى غالبا ... لازم تمنطقي كل حاجة ؟؟ طيب بلاش منطق .. بس عاوزة تفسير... ممكن ييجى زى ما جه قبل كده وممكن مايجيش ... بس ماتقعديش تلبسى ناس من الشرق و الغرب تهم .. ده حتى حرام ؟ ماهو ممكن تكون المشكلة فى ! السخونة بس أنا أحسن دلوقتى ! أحسن ؟ بأمارة إيه ؟؟ الموتور الداير بيحاول يلاقى تفسير منطقي ؟ بلا غباء بقى .. انتى أصلا ممكن كان كل حاجة قدامك بس ماكنتيش شايفاها ... بس أنا لحد دلوقتى مش شايفة أى حاجة فعلا !!! و للأسف كل حاجة طارت فى الهوا كلها ماكانتش حاجة مادية يتعاد دراستها . دراسة إيه و هباب إيه .. ماكنتى تبقى دقيقة ولا قوية الملاحة من الأول أحسنلك و ليا بدل الوش اللى هايفضل شغال فترة ده .. أصل أنا عارفة اللى هايحصل ..و الدنيا مش مستحملة ضياع و قت أكثر من كده ... بس أنا من حقى أعترض على اللى حصل .. و أيه اللى حصل مش كنتى عاملة شاطرة و متوقعة أى حاجة ؟ دلوقتى مندهشة و متفاجئة ؟؟؟بلا خيبة بقى .. جاتك ستين خيبة عمرك ما بتتعلمي أبدا .. محتاجة إيه تانى يحصل علشان تتعلمى تحللى صح ؟أهمدى و أهدى و أنسى تخاريف و هلوسة السخونة و أحلام الفتى الطائر دى و خليكى فى المهم .......خلينى فى المهم . .بذمتك ده منظر ترجعى بيه بعد فترة ؟ و كمان أول بوست فى سنة جديدة ...فعلا النكد له ناسه ... معلش أى حد هايقرا ده يسامحنى الدنيا صحيح مش مستحملة ...بس لازم أطلق الشحنة هنا علشان مش هاعرف أصلا اكون الجمل دى تانى فى الحياة الطبيعية .. يمكن بطريقة تانية بس مش كده. ماعلينا ... المهم تعقلي و تركزى بقى و تصرفات سن 16 دى تبطليها و ترحمينى شوية حسسينى أنك كبرتى ؟ .. مانا كمان نفسى برضه احس أنى كبرت .. و ساعات بحس ..أنى كبرت أكثر من اللازم .. .. مش باين .. أما نشوف
2 comments:
السعادة قرار .. create joy :)
أميرة الجوهري..
أولا أسفة جدا على تأخير الرد المدة دى كلها ... مش مركزة كويس و أنا على بلوجر وعشان كده ما بأخدش بالي من حاجة زى الكومنت .. و خصوصا أن من فترة طويلة ماجاليش كومنت من حد .. فا مش بأدور أصلا فى الكومنتات
عموما .. أنا متفقة معاكى فى ردك .. عيبى ربما أنى مش بأقدر أحيانا أتناسى القيود اللى بأحطها لنفسى .. لكن فيه حاجة كمان ... ربما تكون حاجة زى الحاسة السادسة .. حاجة داخلية مالهاش تفسير بتحذرني و فى كل مرة بيثبت أن التحسب ده له مبرر ...و كل مرة بأحس أنى أنقذت من مصيبة . لكن البوست ده بالذات وكما ذكرت بعده كان فى فترة مرض ربما أعطتنى القدرة على الهلوسة..هههههههه...لهذا جرعة الكآبة و الإنفعال كانت عالية شوية.
شكرا على التعليق :)
Post a Comment