عبد الوهاب ... 20 سنة

قلبي يميني لساني
روحي فدا أوطاني
كان الجهاد أماني
واليوم يوم الجهاد
نشيد الجهاد - 1939

في الليل لما خلى ... إلاّ من الباكي
والنوح على الدوح حلى ... للصارخ الشاكي
ما تعرف المبتلى ... فى الروض من الحاكي
فى الليل لما خلي - 1932

الماضي المجهول

معرفش ليه من مراهقتى المبكرة بحب الفيلم ده
يمكن بسبب احمد سالم !!! شخصيته من الشخصيات اللى اكتشفت انها شخصياتى المفضلة احب و اكره صفاتها فى نفس الوقت ( يمكن اكون محتاجة علاج نفسى من انفصام فى الشخصية ...أو يمكن دى الطبيعة المزدوجة للحوت ) ده حسبما أتذكر مما كتب عنه محمد التابعى . وأن سبب وفاته فى سن صغير نسبيا 39- سنة - هو رصاصة كامنة أتحركت من مكانها .والنهاردة كمان اكتشفت انه من نفس برجى "الحوت" 20 فبراير 1910.
الفيلم انتاج 1946 . و النهاردة اتفرجت عليه تانى . اللى إسترعى انتباهى النهاردة فى الفيلم هو التتر . بسيط و أنيق و الأكثر و الأهم انه بيحترم المشاهد و التاريخ كمان.
القصة و السيناريو و الإخراج لأحمد سالم نفسه و التتر ذكر كل الممثلين و شخصياتهم فى الفيلم وذكر كل فريق العمل من إضاءة و مونتاج و حتى الرجيسير بإحترام .
كمان ذكر كل الأغانى و الملحنين بالتفصيل و بالنسبة حتى للإهداء كتب أن أغنيتين من أغانى الفيلم إهداء من محمد عبد الوهاب
اللى عجبنى جدا أن أغنية منهم مهداة بتصريح من الإذاعة الاسلكية المصرية !! أعتقد أنها الأغنية المعروفة حاليا بإسم "الفن" و فى الفيلم إسمها "الدنيا ليل" يعنى الفيلم راعى حتى حقوق الملكية الفكرية اللى بنتكلم عنها النهاردة .
كمان الفيلم راعى ذكر أن القصة مستوحاة من أبحاث طبية لعالم فرنسى اسمه على ما أتذكر "شاركوه" . ببساطة بيقول أحنا عندنا أساس علمى . و فى النهاية الفيلم أكد أن كل الشخصيات و الأحداث من وحى الخيال و دى ملاحظة مش عارفة إيه سببها فى قصة زى قصة الفيلم ده بالذات .
المهم أن الفيلم ده كان فرصة سعيدة أن ليلى مراد تغنى رائعة عبد الوهاب "الفن" كاملة متضمنة حتى الجزء الخاص بالفاروق اللى تم حذفه من نسخة عبد الوهاب بعد ثورة يوليو و تغنى أغنية من الفلكلور المصري على ما أعتقد - أو هى أصبحت من الفلكلور المصري بعد ذلك - هى "سلم علىّ" موسيقى أو توزيع عبد الحليم نويرة.
مش عارفة ... بغض النظر عن أناقة الفيلم فالتتر هو اللى زود إحساسى بهوة بيننا و بين ماضينا القريب .
و مع الأحداث القريبة اللى صاحبت وفاة الأميرة فريال .... حاسة بضيق

ببـسـاطـة ....عبــد الـوهــــاب

من كام يوم كانت الذكرى الـ 18 لوفاة محمد عبد الوهاب ( الله يرحمه ) أنا مش خبيرة موسيقية ولا حتى أعرف أوليات الموسيقى أنا مجرد مستمعة لكن وجهة نظرى الشخصية اللى ممكن تتعارض مع بعض الأراء المتخصصة و اللى كمان مش هاتضيف حاجة جديدة أنه ببساطة عبقري مصري صميم المفروض نحافظ على تراثه و ننشره أكثر بكثير من الحاصل حاليا لأنه لمصر حاجة زى بيتهوفن لألمانيا محدش بيقول إن بيتهوفن راحت عليه و إحنا فى القرن الواحد وعشرين!!.
ده رأى مش بناء على غسيل المخ الإعلامى المعتاد اللى لما يقرر أن فلان كويس يبقى ما بيغلطش بس بناء على ثلاث حيثيات
أولا : الاغنيات اللي سمعتها له سواء كملحن أو مطرب - وبأشدد على مطرب علشان مينفعش أقول عن عبد الوهاب انه مغنى فى حين حضرات المذيعين بيقولوا عن سعد الصغير و تامر حسنى مطربين !!!!
ثانيا :عدة كتب ومقالات قرأتها عن حياته و نشأته منها اللى هو أملاه و منها المكتوب عنه قبل وبعد وفاته من معاصريه
ثالثا : لقاءاته هو شخصيا مع سعد الدين وهبة فى البرنامج التسجيلي النهر الخالد وده اتعرض على ما اتذكر بعد وفاته مباشرة على التلفزيون المصري

بالنسبة لى عبد الوهاب ببساطة عبقري مش للموسيقي اللى أنتجها إنما للشخصية اللى كونها و اللى نتيجة من نتائجها هى الموسيقى اللى احنا لازلنا بنستمتع بها للنهاردة. الشخصية اللى بهرتنى بأناقتها فى الكلام والحركة - اللى ممكن تؤخذ عليه أحيانا كتصنع - والمظهر فى برنامج النهر الخالد لشخص تعدى الثمانين . كمان بهرتنى بذكائها و لباقتها - دبلوماسية قاتلة أحيانا - وكمان خفة دمها المحسوبة . الشخص اللى القدر ساعده أحيانا لكنه إستثمر المساعدة دى أضعاف أضعاف إلى أن أصبح هرم من اهرام مصر الحديثة.

عبد الوهاب حسب كل الروايات من أصل شعبى - حى باب الشعرية القاهرة - إحترف الغناء صغيرا و إحتضنه أمير شعراء العربية فى العصر الحديث أحمد شوقى و ساعده إنه ببساطة فتح له الطريق لأشياء كثير متضاربة أحيانا لكنه - عبد الوهاب - إمتصها جميعا و أنتج أولا شخصيته ثم فنه و حياته كلها .

عبد الوهاب لو ما كانش موسيقى كان ها ينجح جدا كلاعب شطرنج محترف على ما أعتقد. ذكى وهادئ و عنده بعد نظر و يقدر يستوعب أى تغييرات فى الموقف. عاصر مصر من أيام السلطنة للملكية للجمهورية ... ملكين وأربع رؤساء جمهورية ، حربين عالميتين و أربع حروب مصرية إسرائيلية . التخت الشرقى البسيط والأوبرا والجاز و التانجو والروك أند رول. الحنطور وعربية الرش و الأنسان على القمر و مكوك الفضاء .بالنسبة لي هو محظوظ أنه مر بالتغيرات دي . وذكي لأنه استوعبها كلها بالإضافة للتغيرات فى محيطه الإجتماعى و الثقافى . يمكن أنا شخصيا بأحسده لأنى يمكن لو فى مكانه ماكنتش هأستوعب التغيرات و فى الغالب كنت هأنزوي أكثر فى مكان ما! ... مش مهم أنا المهم أن عبد الوهاب بفضل ذكائه ده و حظه السعيد و حظنا الأسعد أبدع موسيقى على مدى سبعين سنة تقريبا ممكن تؤرخ لتطور الموسيقى فى مصر و العالم العربى وتؤرخ كمان لتاريخ مصر خلال القرن العشرين .

موسيقى عبد الوهاب بالنسبة لى -و مع وجود ملحنين عظام أخرين فى نفس الفترة أحب أستمع لأغنياتهم و موسيقاهم جدا - إتمتعت بشئ بيخلينى أنا غير المتخصصة و حتى غير الملمة بالمبادئ أعرفها على طول و اقول دى بتاعة عبد الوهاب .موسيقاه فيها نوع من الأناقة غريب وماقدرش أوصفها غير بـ "الأناقة " مش غيرها . حاجة راقية إجتماعيا مش موسيقيا و بس ومهما كانت مغرقة فى الشرقية و لا حتى السياسة - يعنى الأغانى اللى لحنها فى الستينات بالذات - و لا حتى قطع موسيقى الرقص الشرقى اللى لحنها كل الموسيقى دى كانت "أنيقة " زى ماتكون موسيقى ملحنها أمير أو أرستقراطى من أعلى طبقة بيتمتع بتهذيب عالي جدا - جنتلمان ... يعني مثلا ديفيد نيفن ولا كارى جرانت أو الأمير تشارلز - و فى نفس الوقت وده يمكن غريب إنى أقوله بس دائما الأحساس ده بأحسه فى ألحانه إن مهما كانت مهذبة و أنيقة و راقية كان عبد الوهاب غالبا بيحب يحط فيها لحظة "مشاغبة"... ببساطة الجنتلمان الأنيق الراقى جدا فى تعامله لثوانى بيظهر منه جانب معاكس تماما مش عارفة أوصفه إلا إنه جرئ أو وقح أو لعوب أو مشاغب أو حتى شعبي جدا وكل ده مش بالمعنى السيئ للكلمات دى إطلاقا بالعكس دي دايما مفاجأة لذيذة فى موسيقاه .
طبعا بدون الحاجة لإعادة ذكر تأثره بأحمد شوقى، عبد الوهاب كان فنان فى إختيار الكلمات اللى بيغنيها قبل ما يكون فنان فى تلحينها . شخصيا بأحب أغانيه الوطنية و القومية بالضبط زى أغانيه العاطفية أو موسيقاه المجردة. ألحانه بتدينى فرصة أستمتع بالكلام لوحده و أستوعبه واللحن لوحده و أحس به. حتى لو كانت الاغنية قصيرة زى اللى إخترتهم المرة دى . وبالنسبة لى أن من أفضل الأغنيات الوطنية إن لم تكن أفضلها على الإطلاق اللى أكيد المصري لما يسمعها يفتكر مصر هى النهر الخالد .عن نفسى فى لحظات العمل بأحب أسمع أغانيه و خصوصا القصائد .أغنية زى دمشق بتطربنى فعلا مع إنها سياسية !!
عبد الوهاب بيسعدني دايما أسمع أغانيه اللى أعرفها له و حتى لو فيه أغانى ماكنتش بأفضلها له أو مش بأحبها ففى لحظات معينة وبدون تحيز بأكتشف أن الأغنية دى بقت مفضلة عندى لأن ببساطة كلامها و لحنها أنا اللى ماكنتش على مستواهم . الله يرحمه.

أنا إخترت أغنيات "شبابية" لعبد الوهاب اللحن سريع و المدة قصيرة ...لكن بكلمات و بطرب

يا دنيا يا غرامى



عندما يأتى المساء

سـكـن الليـل ... محمد عبد الوهاب / فيروز/ جبران خليل جبران

سكن الليل و في ثوب السكون تختبي الأحلام
وسع البدر و للبدر عيون ترصد الأيام

فتعالي يا إبنة الحقل نزور كرمة العشاق
علنا نطفي بذياك العصير حرقة الأشواق

اسمع البلبل ما بين الحقول يسكب الألحان
في فضاء نفخت فيه التلول نسمة الريحان

لا تخافي يا فتاتي فالنجوم تكتم الأخبار
و ضباب الليل في تلك الكروم يحجب الأسرار

لا تخافي فعروس الجن في كهفها المسحور
هجعت سكرى و كادت تختفي عن عيون الحور

و مليك الجن إن مر يروح و الهوى يثنيه
فهو مثلي عاشق كيف يبوح بالذي يضنيه

والذكريات صدى السنين الحاكي ... يا جارة الوادي ... محمد عبد الوهاب/ أحمد شوقي

أعترف أنى لأسبوع مضى لم أستمع لهذه الأغنية بعدم إحساس بالإنحياز ضدها ربما لأنى لم أتفاعل معها بصوت عبد الوهاب -مع عميق تقديرى و إحترامي و محبتي له- لأنه ربما النسخة الوحيدة لها عندى ليست جيدة بما فيه الكفاية. لكن الرجوع للحق فضيلة . أداء نور الهدي -وهى من أكثر المطربات اللواتى أحب صوتهن وأحس أن إختفائها من مصر مبكرا كان خسارة كبيرة - ومن بعدها فيروز بنسختها من الأغنية جعلنى أستمع لهذه الأغنية وحدها فقط خلال الأسبوع الفائت .

يا جارة الوادي طربت وعــادني
ما يشبه الأحلام من ذكـــراك

مثلت في الذكرى هواك وفي الكرى
والذكريات صدى السنين الحاكي

ولقد مررت على الريـاض بربوة
غناءة كنت حيالهــــا ألقاك

ضحكت إلى وجوهها وعيونهـــا
ووجدت في أنفاسها ريـــاك

فذهبت في الأيام اذكر رفرفـــا
بين الجدوال والعيون حـواك

أذكرت هرولة الصبـابة والهوى
لما خطرت يقبلان خطــاك؟

لم أدر ما طيب العناق على الهوى
حتى ترفق ساعدى فطواك

وتأودت أعطــاف بانك في يدي
واحمر من خفريهما خداك

ودخلت في ليلين:فرعك والدجى
ولثمت كالصبح المنور فاك

ووجدت في كنه الجوانح نشـوة
من طيب فيك ومن سلاك لماك

وتعطلت لغة الكلام وخاطبت
عيني في لغة الهوى عينــاك

ومحوت كل لبانة من خاطرى
ونسيت كل تعاتب وتشاكـى

لا أمس من عمر الزمان ولاغد
جمع الزمان فكان يوم رضاك

عندما يأتي المساء

عندما يأتي المساء ... ونجوم الليل تنثر
إسألوا الليل عن نجمي... متى نجمي يظهر
عندما تبدو النجوم في السما مثل اللآلئ
إسألوا هل من حبيب عنده علم بحالي
كل نجمٍ راح في الليل بنجم يتنور
غير قلبي... فهو مازال على الأفق محير

يا حبيبي... لك روحي... لك ما شئت وأكثر
إن روحي ... خير أفقٍ فيه أنوارك تظهر
كلما وجهت عيني نحو لماح المحيا
لم أجد في الأفق نجما واحداً يرنو إلي

هـل تُرى يا ليل أحظى... منك بالعطف علي
فأغني... و حبيبي... والمنى بين يــديَ