Hahahaha, but it's true, I am Hitler .

I totally forgot this post, it's been along time after all :) but skimming through the blog to ID another post brought this right into my face. And It is a 100% percent true I must admit, I admitted being a Rogue Wanderer and renamed the blog after it already, But in the past 13 months I can easily claim I was this Hitler. :) nice to verify these result after all this time, hahahahahaha. will try to re-adjust into something like ..... Kennedy !.....Mitterand ....I mean if I must be a politician :D :D :D

التينة الحمقاااااااااااااااااء

بعد البحث و الفحص تأكد لي بما لا يدع مجالا للشك أن الشعب المصري يعود بجذوره الجينية إلى ... التينة الحمقاء

زمان وانا فى المرحلة الإعدادية درست نص شعرى لإيليا أبى ماضى .. كان اسمه التينة الحمقاء .. كان اسمه عاجبنا فى المدرسة بس من باب الفكاهة .. مدرسة اللغة العربية -ربنا يجازيها خير الجزاء- شرحت لنا النص كويس وفهمته لنا و كمان حفظنا القصيدة انما استمر اسمها بيذكر من باب الفكاهة .. لحد فترة قريبة لما ابتدأ يلح علي ذهنى .. انما مش للفكاهة .. للحكمة و الموعظة .. للغم و النكد اللى احنا عايشين فيه بسبب غباء مالوش حل من كل ناحية .. انا بتكلم عن المواطنين العاديين مش بتكلم عن السلطة ولا أى حاجة ... بتكلم مثلا مثلا عن عمال الرى فى أسنا اللى العبقرية بتاعتهم هدتهم إلى انهم يهددوا  بإغراق ما بين القاهرة و الأقصر ..يا سلاااااااام .. ده على اساس مثلا ان ولا واحد فيهم له قرايب فى المنطقة دى يخاف عليهم !!!!! ولا بتوع السياحة فى الاقصر اللى قفلوا معبد هناك قصاد السياح  احتجاجا على مش فاهمة إيه مادي مضايقهم .. كان السياح دول جايين يزوروا بورينجا العظمى مش المعبد اللى هم بيسترزقوا منه بطريقة أو أخرى!!! ... ولا بتوع دمياط اللى قفلوا مصنع مشغل أولادهم مع انه بشهادة الجميع غير مضر بالبيئة زى ما هم مصرين وبعدين يرجعوا يقولوا بطالة ... !!!!!ولا بتوع السكة الحديد اللى عطلوا القطارات علشان مطالب  بزيادات مادية !!!! على أساس أن دخل الهيئة بيجى من بيع السبح  مش من حركة القطارات 

من الكام مثال بسيط دول  لطريقة التفكير الحمقاء المتغلغلة عندنا توصلت لتوصية هامة : يجب إذاعة القصيدة 24 مرة يوميا لمدة سنة فى    كل القنوات لعل وعسى حد يفهم حاجة  ..  واقترح سيرين عبد النور اللى تغنيها .. على أساس أنها متخصصة فى اللغة العربية الفصحى  

هو وهى

ملاحظة كوميدية محتاجة تفسير من  رجل لأنى مش غاوية علم نفس أولا وأكيد الملاحظة دى لها تفسير فى علم النفس ..وثانيا لأني طبعا مش رجل فأنا معنديش نفس المعطيات علشان أوصل لنتيجة شبه مؤكدة

هو ... صورته على موقع التواصل الأجتماعى فى أعلى إيحاء باللياقة و/أو الإنطلاق  و/أو الأناقة و/أو خفة الدم و/أو العمق الفكري و مايمنعش أنها تكون أصغر من السن الحالى  بحوالى تلات أربع خمس ست سبع سنين 

 هى ... المدام  ... صورتها على نفس موقع التواصل الأجتماعى تتكون من  هى (وأحمال الدنيا ظاهرة عليها يا حرام ) + هو +  2/3/4   أطفال هو شايل واحد فيهم مثلا وسنه وشكله الحقيقيين ظاهرين ويفطسوا من الضحك للمفارقة  مع الصورة الشخصية المذكورة أعلاه 

لاحظتها و عاوزة تفسير ..حد عنده تفسير :)))))))))ـ

طبقية

أول مرة أحس أنى انسانة ... لوكال

مش علشان انا مستواي الأجتماعى متدني ولا ساكنة فى عشوائيات ولا علشان عربيتى موديل 1900 ولاحاجة من دى

أنما علشان أنا بأشترى كتب رخيصة ... مش رخيصة بمعنى رديئة المستوى الفكرى أو الأدبي ... رخيصة علشان مثلا من مكتبة الأسرة اللي كتابها ممكن يكون ب 5 جنيه أو نسخ طباعتها قديمة وممكن النسخة تكون بسبعة أو عشرة جنيهات

الموضوع أنى أثناء مناقشة مع أصدقاء أكتشفت أن من أهم عوامل شراء نسخة كتاب أنها تكون طباعة فاخرة النسخة على الأقل بخمسة وعشرين جنيه

ساعتها حسيت إحساس أحمد زكى فى مدرسة المشاغبين ! و أنكسفت أقول أنى فى يوم أضطررت أشترى نسخة "سكند هاند" -مستعملة يعني- من مذكرات اللواء محمد نجيب لأنها كانت أول و أخر مرة أشوفها ولازم أقراءها

Ha ha ha ........but it's true!

Life: An STD with 100% mortality rate .

حكمة هذه الأيام

انا بذئ وأشتم ..... إذن أنا ثائر مثقف

أنا أرفض الوقاحة و البذائة ..... إذن أنا فلول

ضحكتونى الله يجازيكم :)

من أول السنة و أنا مش فى حالة نفسية سعيدة لأسباب كثيرة عامة و خاصة
أنما النهاردة ضحكت من أعماقى لما قرأت الريبورتاج الأتى بيان جزء منه . بجد كانت نيتى سليمة و أنا داخلة أقرأ المقال .. قلت أفهم ... يمكن ... إنما ... دخلت لقيت فوزية البرجوازية جوة !!ـ
فاكرين لما إسعاد يونس(المثقفة جدا) قالت لنبيلة السيد (الجاهلة جدا) يا برجوازية وأهل الحارة اللى على قد الحال من كبيرهم لصغيرهم إحتاروا فى تفسير الكلمة ... أنا بقى كنت فى مكان نبيلة السيد المرة دى
طيب أنا هاقولكم اللى لخبطنى واللى فاهم يفهمنى (أمانة)ـ

ويذكر الكتاب كيف أن فاروق حسنى قد سجل فى هذا المعرض انتصارا لدسامة " العجينة اللونية " فأتت كثيفة سخية ، وحتى فى المواضع التى نستشعر فيها شفافية اللون على اللون لا نعدم الاحساس بـ " طراوة " الطبقات فوق الطبقات .. أما عن الشحنة العاطفية فى أعمال حسنى هذه المرة فقد تخلى عن خطته الحركية الإنفجارية المعتادة إلا فى القليل من الأعمال وتبنيه خطة سكونية تأملية طبعت أعمال المعرض فى عمومها بطابع من التشبع الوجدانى إذ تستشعر وأنت توالى التطواف بين اعماله أن ثمة من يناجيك شاكيا عدم اكتمال مشاعره ساردا إلى ناظريك حكايات لم تكتمل من حب لم يبلغ ذروته .. المعانى لا نهاية لها فى هذا الصور ومهما كثرت الصور فإنها عاجزة عن الإحاطة بجميع المعانى !!ـ


المقال كاملا هنا
http://shabab.ahram.org.eg/Inner.aspx?ContentID=3827&typeid=31&year=2010&month=04&day=04&issueid=6

للعلم فقط : أنا عارفة ان فيه ناس كثير مش بتطيق فاروق حسني لكن بالنسبة لى أنا لا بأحبه ولا بأكرهه وعمرى ما أفتكر أنى شفته بيتكلم إلا مرة أو اتنين أول ما دخل الوزارة . وبالتالى ده مش تريقة عليه ده تريقة على الشرح العلمى الفنى الوافى اللى واضح جدا جدا لمواطنة بسيطة زيى كان نفسها حد يفهمها (بجد) ليه ده بيعتبر فن راقى فى حين ان شخبطتى وانا فى ابتدائي واعدادى وثانوى محدش اعتبرها كده !؟ ـ

الـ منطق

عادى :S

يمكن تكون مشاهدتي للأفلام نوع من الهروب من حياة سخيفة مافيهاش منطق فى أغلبها

ـ*هو كده / عادى يعني * عموما هو شعار معتمد فى أغلب مجالات الحياة حوالينا

ليه كذا ؟ - عشان ده العادى يعنى

ليه؟... علشان كل الناس بتعمل كده

أيوة برضه ليه؟ ... علشان كل اللى زيك كده

ليه ؟ ....علشان أهلنا كانوا بيعملوا كده
وليه مبقاش مختلف ما أنا أساسا مش بأعمل حاجة غلط... علشان هو كده ...وكمان مختلف !!!! (مصمصة شفايف ) ـ

المهم ..مش دى النقطة اللى هأتكلم فيها النقطة اللى هأتكلم فيها حاجة جرتنى ليها الأفلام و ضحكت الضحك اللى من نوعية ضحك كالبكاء - غالبا دى نوعية الضحك اللى بنضحكها دلوقتى - بأحب أحيانا أتابع على موقع خاص بالأفلام العالمية مناقشات المشاهدين عن الفيلم

الفيلم اللى أنا شفته وقررت اتابع مناقشاته من افلامى المفضلة .واحد من المشاهدين المعلقين ( اللى هما كلهم تقريبا غربيين من أوروبا و أمريكا الشمالية و الجنوبية) طرح نقطة ضايقته جدا جدا فى الفيلم البطل و البطلة بعد لما شربوا نبيذ فى منتزه عام ...... سابوا الإزازة و الكأسات على مقعد فى المنتزه و مشيوا من غير ما يرموها فى المكان المنطقى - صفيحة المهملات . كمية التعليقات على النقطة دى و بتؤيدها جدا ان دى يمكن أسوأ لقطة فى الفيلم كله ضايقتنى صراحة

...

ماهو عادى يعنى ( مصمصة شفايف)ـ

بس خلاص ... أخف من شكة دبوس

المتكلم مجنون بس المستمع المفروض يكون عاقل

أنا ماليش فى الكورة ... بس لي فى الأدب

الكائن اللزج اللى اسمه مدحت شلبى قال على الهواء مباشرة -فى برنامج تليفزيونى اكيد له جمهور لأنه ببساطة برنامج عن الكورة- حاجة صنفها البعض على أنها نكتة ساخنة . وهو صنفها يدوبك على انها نكتة ظريفة ممكن تتقال - صورة جورج دبليو بوش جت فى دماغى حالا- وقالها بمنتهى الثقة على الهواء - قرأها من رسالة بريد الكترونى للبرنامج -.
أنا بسبب الضجة اللى حصلت سمعت النكتة على مدونة من المدونات و صعقت . وبرضه افتكرت حالا محمد صبحى لما قال فى مسرحيته "انت حمان يا حمان؟؟؟".
هو الحقيقة غير أنها خارجة فهى سخيفة مش ساخنة .

لما المذيع تجيله الجرأة انه يورى وشه تانى للجمهور علشان يقول انها قلشة إعلامية منه و انه قال النكتة بحسن نية وانه تقبل لفت النظر من القناة الفضائية بصدر رحب رغم تاريخه الإعلامى الطويل -على اساس أنه مين مش فاهمة- والبرنامج يستمر عااااادى خالص و المذيع شغال والقناة شغالة ومحدش يقولهم تلت التلاتة كام يبقى اسمحولى بقى ... محدش يكلم غادة عبد الرازق و لا حد يعترض على دينا و اللى بيحصل فى الشوارع



لفت نظر قال .... وتاعبين نفسهم ليه

فيلمُ مش من إخراج ........ حسن الإمام

عدم تمييز

الأب يموت
الأم هاتشتغل فى البيوت
الإخوة السبعة كلهم أطفال بريئة 4 بنات و 3 أولاد
البنات منهم واحدة عمياء وواحدة عندها شلل أطفال
الأولاد فيهم واحد عنده عيب خلقى خطير بالقلب ومحتاج فلوس للعملية
الأم تسقط ضحية للسل و متقدرش تشتغل فى البيوت
البطل مش لاقى شغل
البطل يبيع نفسه
ناس كثير تتعاطف مع البطل لما يشتغل جاسوس
!!!!!

خيبة أمل راكبة ....... قرش

أول أمبارح - تعرض 4 سياح لبتر اجزاء من أطرافهم اثناء سباحتهم فى شرم الشيخ بواسطة قرش متوحش

إمبارح - خبر صغير من وزارة البيئة ان مركب ألقت خراف نافقة فى البحر الأحمر هي السبب و جثث الخراف هى اللى جذبت القروش المتوحشة للشواطئ

إمبارح برضه - إلقاء القبض "والله موقع أخبارى كان كاتبها كده" على القرش المتهم وفى الواقع هما قرشين قرايب وتمت مضاهاة بصمات الفكين وإصابات الضحايا و ثبت بما لا يدع مجال للشك انهما الفاعلين و بناء عليه صدر قرار بتحنيطهما عقابا لهما وجعلهما عبرة لمن يعتبر

النهاردة - القرش الخفي ... قريبهم التالت ...قتل سائحة ألمانية
و الشواطئ كلها اتقفلت

معرفش بس افتكرت المرحوم الدكتور حامد جوهر .. اللى مافلحناش إلا فى التريقة على طريقة كلامه ( على كبر سنه) و نسينا اهميته واللى كان بيمثله كعالم كبير الله يرحمه

ياللا من ضمن ...

فى بيتنا بلكونة

بس مش بتاعتنا ..بتاعة الجيران

بصراحة فى منطقتنا ماكانش فيه اى حاجة تدل على اى حاجة اسمها انتخابات
يمكن اكون لمحت يافطة او اتنين مش مميزين على بعد يعنى على اطراف الحى كده قرب المناطق الشعبية فى الحى - اصل احنا فى المنطقة الأرقى نسبيا منه
ما أعرفش مين المرشحين إلا من زميلى اللى ساكن فى نفس المنطقة بس أقرب للجزء الشعبى منى و اللى فسر لى حالة الهدوء الأنتخابي التام فى منطقتنا أننا أساسا مالناش قيمة لأى مرشح لأن منطقتنا أغلب عماراتها فاضية ! يعنى انا المقيمة من مليون و ميت الف سنة هنا ماليش قيمة
ولو ان بصراحة برضه ماتفرقش معايا مين مرشح ومين لأ . لأنها أصلا ماتفرقش معاهم .. أنا سلبية .. عارفة
انما اللى اصابنى من الانتخابات هو انى فى يوم فى الصالة لقيت بلكونة قدامى على طول ولو حد وقف فيها ان شاء الله هايتفضل معانا غداء و عشاء و إفطار
ليه بقى ؟ لأن منه لله بقى اللى كان السبب - اللى انا ماعرفوش بالضبط - سمح قبل الأنتخابات للمقاولين - اللى كانوا زى الفيران من فترة- يعلوا العمارات زى ماهم عاوزين و بالتالى العمارة اللى ترخيصها يخليها مستواها اقل من مستوى عمارتنا مع انه نفس عدد الادوار (انما الاسقف دلوقتى منخفضة اكثر من زمان) اصبحت بقدرة قادر ضعف عدد ادوار التصريح
شارعنا اللى طوله 100 متر لوحده فيه 3 عمارات بالشكل ده . الدور كان بينتهى فى يوم مش عارفة ازاى . و التشطيب بالكامل فى يوم كمان ودمتم
والفرجة الحقيقية كانت الادارة الهندسية فى الحى و هى عاملة هجوم تتارى كل يومين قال ايه زعلانين وواخدين على خاطرهم من المقاول انه بيبنى مخالف !!! بس الحق يقال المقاول كان دايما بياخد بخاطرهم ويبدى اسفه وندمه على خطأ غير مقصود

انا بكتب الكلام ده ليه بقى ... اصل بصراحة مش غاوية اعزم الجيران على الفطار و الغدا و العشا كل يوم وعلشان كده انا بأقول لأى حد عاوز يشترى شقة مايجيش منطقتنا أصل كل العمارات وحشة و الشقق كمان غالية قوى بتشطيب اى اى اىىىىىىى كلام

مش ليا حق بقي لما اقول عاوزة اروح اى حتة تانية ؟

كليشيهات ..... ناقصاها هى كمان

واحدة تظهر فجأة بعد 10-11 سنة بدون اى علاقات من اى نوع لأننا أصلا كنا زملاء وبس علشان تعكس عليا مشاكلها وتحاول تقنعنى ان حالتى الصحية هى نتيجة حالة نفسية بسبب حالتى الإجتماعية !! وانها كمان تعبت لنفس السبب - بس هى ماكانتش واخدة بالها .. يبقى انا كمان مش واخدة بالي- بس هو ده السبب ... هى عارفة ( وده كفاية) !!ـ

و بعدين تحاول تقنعنى بعدها ان اهم حاجة اننا نحمد ربنا على اللى احنا فيه و انهم 24 قيرط موزعين بالعدل

... يا سلاااام

من ضمن آفاتنا كمان الإفتراض .. الكل بيفترض انه *حدق* و بيفهمها وهى طايرة .. مع انهم اصلا و لا بيفهموا ولا بيميزوا وكل اللى بيعملوه انهم بيطبقوا كليشيهات فاشلة منقولة من ايام جدة جدتى..لأن جدتى كانت متقدمة أصلا عن الموجود النهاردة . مهما حاولوا يقنعوا نفسهم بالعكس

العقل فعلا عضو ضامر فى مجتمعنا

.

.

ولسه .. غالبا هاعمل تاج اسمها كليشيهات .. فى الفترة الجاية انا متوقعة حاجات كثير

لأ بجد بجد .. الناس بتتجوز ليه ؟

ليه ؟؟ يعنى لسبب محدد وهو وحظه يا لاقاه يا مالقهوش و لا علشان ده اللى ماشى فى البلد و الدنيا ؟ ولا علشان يطلعوا عقدهم على باقى الاطراف ولا هو كان بيبقى قصدهم طيب بس الظروف ؟؟

يعنى اللى يتعامل مع زوجته على انها ناقصة تربية ودين و تعليمها مش عاجبة ومع ذلك رامي لها - بالمعنى الحرفى - الاولاد تربيهم ليل ونهار لوحدها وتصرف عليهم كل حاجة عدا مصاريف المدارس اللى تواضع و دفعها وبيعايرها و يعايرهم بيها و تذاكر لهم ليل و نهار كل المواد و بلغة اجنبية اصلا - لأن اللى تعليمها مش عاجبه دى حاصلة على الماجستير من كليه عملية و تعرف 3 لغات بإجادة تامة - وهو جرى وراها 5 سنين يطلبها وهى ترفض و بالعكس ترشح له عرايس تانية ولما تعاتبه وتقول له الاولاد محتاجين وجودك اكتر يعاقبها ويعاقبهم - ده مفترض انه اتجوز ليه اصلا ؟؟؟؟
ولما واحد يخطب واحدة اصغر منه بعشرين سنة ومن مستوى اجتماعى اقل و يعمل لها عمليات تجميل علشان شايف ان جسمها مش متناسق و يشترى لها الهدوم و يغير لها اسلوبها فى الملابس من قبل حتى الزواج الرسمى و يمنع اهلها يشتروا او يفرشوا اثاث بيت الزوجية يبقى متجوزها ليه برضه اذا كانت مش مقنعة له شكلا او مضمونا من اولها ؟؟؟؟
ولما واحد يجري ورا البنات و الستات على النت و يعمل علاقات و يرجع يقول اصل انا لو كنت اتجوزت اكبر شوية كانت اختياراتى اختلفت - انا متفهمة نقطة الاختيار فى السن الصغير و انها غالبا خطأ - انما هى كمان مالهاش ذنب انها تتخان بسبب غلطة مشتركة يبقى اتجوز ليه ؟؟؟؟
ولما الراجل أو اهله يقولوا على مراته "يحمدوا ربنا انهم لقوا حد يتجوزهم" طيب يعنى هى ماضربتكمش على ايديكم انكم تتقدموا لها و تخطبوها ده كان عرض وطلب و انتم الللى ابتديتم بالعرض وهى كانت بنت صغيرة و بنت ناس يعنى مش واقعة يبقى ايه لزمته الكلام اللى مالوش لازمة؟؟؟؟
ولما الراجل يكون بخيل لدرجة الموت وبيقفل دواليب المطبخ بالقفل ويوم مايجيب لها هدية بتكون باكو شيكولاته من ابو تلاتة جنيه يبقى ايه لزمته يكلف نفسه مصاريف فرح و شقة و شراء دواليب مطبخ اصلا مادام الموضوع مش مريحه ؟؟؟؟؟
ولما الاب ما يكلفش نفسه يقوم يشوف ابنه الوحيد بيعيط ليه وينادى الام من اخر البيت تيجى تشوف الولد ماله يبقى جاب ولد ليه ؟؟؟؟؟
ولما اصلا يكون الرجل مش مؤهل طبيا انه يتجوز بيتجوز بنات الناس و يبهدلهم ليه ؟؟؟؟
ولما يكون اساسا اساسا ملوش ميول طبيعية برضه بيبهدل بنات الناس معاه ليه ؟؟؟؟
ولما يكون السبعين فى المائة من الأزواج اصلا مش متناسقين مع بعض - زى لوريل و هاردى كده - برضه ياترى بيكونوا اتجوزوا ليه؟؟؟

لما واحد زى ايهاب صلاح يتجوز واحدة زى منى زوجته اللى قتلها بيكون ليه اتجوزها اصلا؟؟؟
ولما واحد زى زوج ايرينى صيدلانية اسكندرية اتجوز واحدة زى العصفورة وبعدين قتلها بالوحشية دى يبقى ليه برضه اتجوزها ؟؟؟؟


اذا عرفت الحل ...... جاوب

صاحب البيت ...باع السلم ... و سكر بتمنه

ربنا ينتقم منه زى ما باع السلم

شيال لكل مواطن

وجدتهااااااااااااا
شغلانة هاتقضى على البطالة فى مصر . لكل مواطن ماشى فى الشارع نعين له مواطن تانى - و ياخد مرتبه من المواطن الأول كنوع من العقاب - وظيفته الوحيدة و الأساسية أنه كل ما المواطن الأول يحب يعدى الشارع المواطن الثانى يشيله على كتفه و يمر به فققققققطططططط من أماكن عبور المشاة سواء أنفاق أو كبارى أو علامات عبور مشاة - لما الأشارة تبقى مفتوحة لهم بس - .
أنا مش من الأرياف أو ما شابهها حيث الشارع مفيهوش أسفلت أصلا و بالتالى مفيش علامات عبور مشاة لأ أنا من أسكندرية ودى فى 70 - 80 % من شوارعها الرئيسية مخططة بالابيض و الأصفر و في اجزاء من الشارع الأهم اللى هو الكورنيش فيها أنفاق على مستوى عالى من النظافة و مع ذلك تلاقى ناس كتير بتعدى الكورنيش من فوق النفق . ليه ؟ مش قادرة افهم لحد النهاردة . حاولت اتخيل قلت يمكن النفق مغلق للتحسينات أو النفق التانى فيه مياه أمطار فى مايو-يجوز برضه !!- أو الراجل ده عنده خشونة فى الركبة مش قادر ينزل السلالم و يطلعها مرة تانية أو البنت طالبة الجامعة دى مستعجلة فقررت تقامر بحياتها و توفر ال 3 ثوانى اللى هاتنزل فيهم السلم و تطلعه و تعدى الكورنيش فى أوسع مكان فيه - سيدى جابر - أو السيدة اللى عندها خمسين سنة دى خايفة تتسرق أو تتخطف فى النفق أو بقى ان النفق مش باين مكانه فين . كل دى أعذار ممكن اتخيلها . اللى مش قادرة ألاقي له مبرر إطلاقا هو ليه أكتر من 80% من الناس اللى بتعدى شارع أبو قير - ثانى اكبر شارع رئيسي فى اسكندرية - عند محطة سيدى جابر مش بتستعمل الكوبرى الجميل أبو سلالم متحركة اللى الحكومة عاملاه ؟؟؟؟ سلالم متحركة يعنى لا خشونة ولا مطر - لأنه مغطى - ولا خطف - لأنه شفاف - و لا خفى - لأنه واااااااااااضح ... حاجة رصاصى تبدأ من الجانب الأيمن و ترتفع لأعلى و تنتهى على الجانب الأيسر من الطريق و فيه بعض الاشخاص باين أنهم بيمشوا جواه - التفسير الوحيد المقبول انهم ... مش بيحبوا الملاهى و المراجيح. ولهذا ورأفة بالشعب اللى عنده فوبيا المراجيح و الأماكن المرتفعة و الأماكن المنخفضة المفتوحة منها و المغلقة اطالب بتعيين شيال لكل مواطن و يارب عدد المعينين يكفى

أن تكون بقرة

هو أن تعبر الطريق بمجرد أن يخطر لك خاطر العبور بدون وضع أدنى احتمال لوجود كائنات أخرى - مثل السيارات بجميع أنواعها - تمر بالطريق - الذى هو فى الأساس مخصص لها - فى نفس اللحظة

أصل المشكلة :)

بحب الذكاء الأنيق !!!!!!!! ـ

...مشمشة : ده ليه علاقة بمناقشتنا من أسبوع . تعرفى ، كل ما أفتكر ده أبتسم من وجهة نظرنا... ... ... ياللا

العــقــــــلاء

صحفيين - مش ناس عادية - بتكيل *شتاااائم* للمنتخب و اللاعبين بسبب خسارتهم من أمريكا
أبو تريكة هايعتزل و حسن شحاتة هايستقيل لو مفيش إعتذار
جمال مبارك بيستقبل المنتخب العائد بنفسه
طاعون من ليبيا و أنفلونزا خنازير من العالم و أنفلونزا طيور صناعة محلية و حمى قلاعية مش فاكرة منين
ليبيا بتدفع المصريين بالذات رسوم على الدخول و الإقامة و الخروج !!! الفردوس المفقود
القائد المظفر معمر القذافى بيعمل زيارة رسمية *تااااريخية* لإيطاليا وهو معلق برواز فيه صورة عمر المختار على بدلته العسكرية
إمتحانات ثانوية عامة فيها طلبة بتصرخ أن الأسئلة ماجاش زيها قبل كده السنوات اللى فاتت و بالتالى الأمتحان صعببببببببببببببب !!! كأن الأسئلة المفروض تتكرر كل سنة كما هى فى أمتحان المفروض يفرق الطالب المتوسط عن الفائق عن الضعيف أو المستهتر
لجنة أمتحان ثانوية عامة مديرتها تجبر طالبتين أنهم يقطعوا أمتحان رياضيات فى منتصفه و يروحوا لجنة تانية فى مدرسة تانية علشان يكملوه !!!!! مفيش تفسير فى الخبر لقرار زى ده
شاب عمره 18 سنة - قانونا طفل وهايتعامل معاملة أطفال إن شاء الله !!!- يغتصب أخته عمرها 8 سنوات و بعدين يقتلها بالسم و أب يرمى زوجته و بنته من البلكونة علشان طلبوا هدوم جديدة يحضروا بيها فرح
لحوم مخلوطة بلحم الخنزير فى دمياط و قنبلة محلية الصنع قالوا إنها راديو طفل ربطه بعمود نور فى إسكندرية و جسم معدني غريب على كورنيش أسوان
النبوى إسماعيل توفى غير مأسوف عليه من كثيرين و المهندس شريف قتل عيلته و مات طبيعى بعد الحكم عليه بالإعدام ، الناس إلى حد ما تعاطفت معاه مع إدانتهم له و معاون المباحث إنضرب رصاص غدر و مات فى أسوان
كل متهم فى قضية مشهورة يطلع ويقول البوليس أجبرنى حتى المدرس اللى أخل بشرف مهنته و صور بنات عاوزة الحرق فى أوضاع مخلة بعد ما إعترف رجع و قال ماقلتش !!! و محاميه بيحاول يفهمنا إنها قضية مدبرة ضده . بناء على إنه حاجة مهمة مثلا و بيشوهوا صورته قدام الرأى العام ؟؟
البنات دول بالمناسبة عمرهم 16 - 18 سنة وواحدة كان بيعاشرها معاشرة الأزواج فى شقته ومنهم اللى لابسين حاجات على رؤوسهم بس واضح إنهم مش فاهمين لابسينها ليه
خناقات كل يومين بين معجبى و معجبات من يقال عنه "مطرب الجيل" تامر بيه حسنى و الفنان اللى بيقولوا عليه هضبة - وقعها سيئ على الكلمة دى - اللى هو عمرو باشا دياب كأن كل مشاكلنا إتحلت و فاضل دى بس مين فيهم الفنان أكثر
زيجات عرفي بين مخرجين و فتيات موديل و فتنانين و ناس عادية كمان و فضائح فى الأعراض من كل نوع و فى كل حتة مجلات و جرائد و مواقع .
مظاهرات و إعتصامات من الحوامدية - أمام مجلس المدينة - لشركة المياه فى الأقصر لشركة الكتان فى طنطا !!! و هلم جرا
والدتى طلعت السنين الللى فاتت دى كلها من فئة مضطهدة اللى هى المرأة و كمان بتشتغل مع وصديقة لــ أقليات مضطهدة اللى هي المسيحيين و النوبيين . و محدش قال لى ولا قال لها طول المدة دى !!! شوف إزاي
شوية أغبياء منقادين بغباء لناس لها أغراض تزود اللى بيقولوا عليها فتنة طائفية عاوزين يغيروا إسم قرية بقالها مليون سنة إسمها ثابت . ومع الحساسيات الموجودة الموضوع بيكبر بدون داعى.
مدير الثقافة الجماهيرية هايمنع طباعة أى كتاب ممكن يزعل المصريين المسيحيين حتى لو كتاب عبارة عن حقائق تاريخية عن المعلم يعقوب و دوره أثناء الحملة الفرنسية . كأنه مكتوب إدانة أو إهانة للمصريين المسيحيين . ماهو كان فيه مليون عميل للفرنسيس من المحسوبين مسلمين . حد إعترض !! و مليون مثقف معارضين لترجمة كتب من تأليف كتاب إسرائيليين علشان قال ده تطبيع!!!!! طيب هانعرف عدونا إزاىىىىىىىى ..............ثم إن محدش بيقرأ فى بلدنا أساسا غير حظك اليوم بالكتير وغالبا مش ها لو فهموا المكتوب . إحنا التعليم فى بلدنا بقى سماعى يا عالم ( البوست الجاي غالبا ) ـ
ناس قالت لأوباما بنحبك زى مايكون نجم روك و ناس قالت ده بوش بس بوجه مبتسم وكاريزما . كأنه مفروض إن رئيس أمريكا تكون أهدافه الإستراتيجية لمصلحة العالم العربي !!!!!
أخر حاجة : سمية الخشاب صرحت إنها أنتجت أغانيها بنفسها لأنها مش عاوزة تقدم تنازلات تجارية .... على أساس إنها هاتغنى نهج البردة مثلا

لكل دول أهدى درة من درر إسماعيل ياسين ...........العقلااااااااااء